“Bolalar uchun yozamiz: ertak-romanlar” ijodiy tanlovida “Qoʻgʻirchoqlar qaygʻusi” nomli ertak-roman loyihasi bilan gʻolib boʻlgan ijodkor Bek Ali ijodiy tanlov haqida fikrlarini bildirdi:
AVLODLAR OLDIDAGI BURCHIMIZ
Ajdodlar oldida qancha qarzimiz boʻlsa, avlodlar oldida ham shuncha masʼuliyatlimiz. Buni ado etish har kimga har xil nasib qiladi. Farzandlarim uchun asar yaratishni niyat qilgan, ammo bunga jazm qilolmay turgandim.
Bolalar kontentini rivojlantirish markazi ertak-roman uchun tanlov eʼlon qilarkan, shu yoʻnalishda oʻzimni sinab koʻrishim kerakligi, asar yaratish bahonasida qanday farzand tarbiyalamoqchi ekanimni yozishim mumkinligini oʻyladim.
Va bismillo, deb asarning kirish qismini yozdim... Hakamlar eʼtiboridan chetda qolmabdi. Endi yozing shoir, deyishdi. Ishonch bildirildi.
Hali bitmagan ishga maqtanish yarashmaydi, biroq bu ishga vijdonan kirishish lozim. Kelajak-avlod masalasida hazillashib boʻlmaydi.
Ayni paytda bir narsaga vaʼda berolaman, boshlayotgan asarimda, avvalo siz-u biz bosib oʻtgan yoʻlning iztirob-u quvonchlari koʻrinadi. Soʻng...
Qolganini oʻqib olasiz.
Elning oldida yuzimiz yorugʻ boʻlsin!
Bek ALI
