Uchrashuvda asosiy eʼtibor bolalar uchun moʻljallangan taʼlimiy va raqamli kontent sifatini yuksaltirish, zamonaviy yondashuvlar asosida yangi loyihalarni amalga oshirishga qaratildi.
Shuningdek, Bolalar kontentini rivojlantirish markazining “Alla” platformasi hamda Taʼlimni rivojlantirish respublika ilmiy-metodik markazining “Raqamli taʼlim” platformasini oʻzaro integratsiya qilish masalalari atroflicha muhokama etildi. Ushbu integratsiya orqali bolalar uchun yanada qulay, sifatli va innovatsion taʼlimiy kontent yaratish imkoniyatlari koʻrib chiqildi.
Tomonlar ijodiy, taʼlimiy va innovatsion loyihalarni hamkorlikda amalga oshirish, pedagoglar hamda mutaxassislar ishtirokida yangi metodik materiallar ishlab chiqish, raqamli taʼlim resurslarini boyitish yuzasidan fikr almashdilar.
Uchrashuv yakunida oʻzaro hamkorlikni yangi bosqichga olib chiqish maqsadida memorandum imzolashga kelishib olindi.
Mazkur memorandum kelgusida bolalar taʼlimi va kontentini rivojlantirishga qaratilgan keng koʻlamli loyihalarni birgalikda amalga oshirish uchun mustahkam asos boʻlib xizmat qiladi.
