“Bolalar uchun yozamiz: ertak-romanlar” ijodiy tanlovida “Alp Arslon” nomli ertak-roman loyihasi bilan gʻolib boʻlgan ijodkor Najmiddin Ermatov ijodiy tanlov haqida fikrlarini bildirdi:
Burnogʻi yil Qozogʻistonga borganda bir holatga havas qilgandim. Nashriyotlar, aksar tashkilotlar, metsenatlar ijodkorlarga buyurtma beradi yoki homiylik qiladi, shoir yo yozuvchi asarni yozadi va yaxshigina qalam haqi ham oladi. Oʻshanda oʻzimizdagi ijodiy sohaga aloqador idoralarning ishlarini oʻylab, atta-ang, deganman.
Biz tengi aksar ijodkorlarda bir oʻy bor. Biror asarning gʻoyasini pishitsang, ozroq parcha ham yozib manfaatdor tashkilotga oborsang. Ularga maʼqul keladigan boʻlsa, bosib yozsang. Tuzukkina qalam haqi ham olsang. Har ikki taraf ham foyda koʻradi. Oʻrtada yaxshigina asar yaraladi.
Shukrki, endi-endi shunday oʻylarning amaldagi jarayonlariga guvoh boʻlyapmiz. Bolalar kontentini rivojlantirish markazi ertak-romanlar yozish boʻyicha tanlov oʻtkazdi. Shunga yozilajak asar gʻoyasini va ozroq parchasini topshirgandim. Hakamlarga maqbul kelibdi. Endi yozish kerak. Yozganda ham katta masʼuliyat bilan yozish lozim.
Muhimi, bolalar adabiyoti bir qator asarlarga boyishidan umidimiz bor. Yana umid shuki, Markaz boshlagan xayrli tashabbus aynan daxldor va boshqa tashkilotlarga ham yuqsa, yozarmanlar safi kengaysa, kuchli-kuchli asarlar yozilsa, bolalarimizning koʻziga bir zumga boʻlsa ham uyalmay, hijolat boʻlmay qaray olsak!
