“Bolalar uchun yozamiz: ertak-romanlar” ijodiy tanlovida “Kushon shahzodasining sarguzashtlari” nomli ertak-roman loyihasi bilan gʻolib boʻlgan ijodkor Suhrob Ziyo ijodiy tanlov haqida fikrlarini bildirdi:
BOLALAR UCHUN AYTARIMIZ BOR...
Pushkin, Tolstoy, Gʻafur Gʻulom, Erkin Vohidov, Muhammad Rahmon, Usmon Azim... bu adiblar ijodida bolalar uchun alohida asarlar, turkumlar bor.
Xudoyberdi Toʻxtaboyev, Anvar Obidjon, Poʻlat Moʻmin kabi ijodkorlar esa butun umrini bolalar uchun yozishga bagʻishlagan.
Har kun qizimga "Mutolaa" ilovasidan bolalar adabiyotidan namunalar eshittiramiz. Shunda aslida badiiy jihatdan pishiq asarlar u qadar koʻp emasligi koʻrinib qoladi. Texnologik taraqqiyotning oʻrtasida tugʻilgan avlod uchun Simba, Muzlik davri, Kung-fu Panda kabi multiklar darajasida taʼsir qiladigan asar topolmayapmiz, toʻgʻrisi.
Bugungi bola uchun nima qiziq, degan savolga qizim Daryo misolida javob izlardim. Masalan, u tomda yashaydigan Karlsonni, Bilmasvoyni, Meshpolvonni qayta qayta eshitadi. Lekin boshqa asarlarga qiziqishi unchalikmas.
Bolalar kontentini rivojlantirish markazi ertak-romanlar uchun tanlov eʼlon qilganida ana shularni oʻylab, biroz ikkilanib loyiha topshirgandim.
Markaz tanlov natijalarini eʼlon qildi. Loyihamiz gʻolib deb topilibdi. Raqobat kuchli boʻlganini bilaman. Ishonch bildirilgan ekan, avvalo, loyiha uchun emas, farzandlarim oʻqishi uchun, oʻqish asnosida millat tarixidan, zamonaviy texnologiyalardan xabardor boʻlishi, ularni tasavvuriga singdirishini maqsad qilib shu asarni yozishga qasd qildim.
Yana bir tomoni, bu tanlov adabiy buyurtma sirasiga kiradi. Yaʼni, moddiy taʼminoti markaz tomonidan qoplab beriladi. Qoʻlimga qalam olganimdan beri faqat koʻngil xohishini yozdim. Shu bilan birga avval bunday loyihalar ham yoʻq edi. Lekin adabiyot tarixida buyurtma asosida yozilgan buyuk asarlar ham boʻlgan. Ular buyurtmachidan ham avval adabiyot va millat uchun yozilgani sababdan bugun oʻqilyapti.
Yo nasib, biz ham shu niyatda bu loyihaga qoʻl urdik. Bu buyurtma davlatning emas, millatning buyurtmasi. Shu sababdan oldingizda hisobdormiz.
Suhrob ZIYO
