“Bolalar uchun yozamiz: ertak-romanlar” ijodiy tanlovida “Angishvona Millining sarguzashtlari” nomli ertak-roman loyihasi bilan gʻolib boʻlgan ijodkor Odinaxon Muhammadjonova:
— Bolalar kontentini rivojlantirish markazining tanlov haqidagi eʼlonini eshitib, oʻzimning ertaklarimdan namunalar yuborgan edim. Gʻolib boʻlganimni esa Markazning telegramdagi xabari orqali bildim.
Toʻgʻrisini aytaman, tanlovda yutishimga koʻzim yetmagan edi. Bu men topshirgan loyihaga ishonchsizlik emas, ayrim qoʻshtirnoq ichidagi tanlovlardan keyin paydo boʻlgan xulosa edi. Bu safar unday boʻlmadi. Meni tanimay, koʻrmay, faqat loyiham orqali baholashdi.
Boshida juda qoʻrqdim — eplolamanmi, qoʻlimdan kelarmikan, masʼuliyati katta, deb. Bugun Markazni, jamoani koʻrib, tadbirda ustozlar aytayotgan fikrlarni eshitib, ruhiyatim koʻtarildi. Endi qoʻrqish emas, qadam tashlash kerak. Millat uchun harakat qilish vaqti keldi.
