Ekspertlar Kengashining navbatdagi yigʻilishida mamlakatimizdagi birinchi fentezi, sarguzasht janridagi zamonaviy ertak-film — “Ikkichi”ning rejissyorlik ssenariysi va qisman tayyorgarlik jarayoni boʻyicha hisobotlar tinglandi.
Ijtimoiy himoya milliy agentligi bilan hamkorlikda ishlanayotgan ushbu film bolalar hayotidagi eng ogʻriqli nuqta — bulling (tazyiq oʻtkazish) muammosiga bagʻishlangan.
Yigʻilish qizgʻin bahs-munozaralarga boy boʻldi. Fentezi janri alohida yondashuv talab etishini inobatga olgan holda, kengash aʼzolari oʻzlarining muhim tavsiyalarini berdi. Loyiha bildirilgan mulohazalarni inobatga olish sharti bilan toʻliq tayyorgarlik bosqichiga oʻtkazildi.
