Oʻzbekistonda xizmat koʻrsatgan artist Matyoqub Matchonovning fikricha, Oʻzbekistonga “Sehrlandiya: qahramonlik missiyasi” kabi gʻoyasi bor, tarbiyaviy yoʻnalishi aniq boʻlgan toʻliq metrajli animatsion filmlar juda kerak.
Bolalar kontentini rivojlantirish markazi Ekspertlar kengashining 16-dekabr kuni boʻlib oʻtgan yigʻilishida “Sehrlandiya: qahramonlik missiyasi” multfilmi kengash aʼzolari tomonidan bir ovozdan maʼqullanib, namoyishga tavsiya etilgan edi.
Kengash raisi, Oʻzbekistonda xizmat koʻrsatgan artist Matyoqub Matchonov bunday filmlar Oʻzbekiston uchun juda kerakligini alohida taʼkidladi.
“Ekspertlar kengashi yigʻilishida multfilm ssenariysini oʻqiganimizdayoq qoʻllab-quvvatlaganmiz. Gʻoyasi bor, tarbiyaviy yoʻnalishi aniq boʻlgan toʻliq metrajli animatsion filmlar bizga juda-juda kerak”, - dedi u.
Ekspertlar kengashi raisi toʻliq metrajli multfilm yoʻnalishi Oʻzbekiston uchun yangilik ekanini eʼtirof etgan holda, film ijodkorlarining ishini alohida qayd etib oʻtdi.
“Qisqa vaqtda juda katta ish qilindi. 90 daqiqali toʻliq metrajli multfilm ijodkorlarining ishi tahsinga loyiq. “Sehrlandiya: qahramonlik missiyasi” multfilmi ustida ishlaganlarni, hech ikkilanmay, qahramon deyish mumkin. Chunki Oʻzbekistonda bu yoʻlni aynan sizlar boshlab beryapsiz”, - dedi Kengash raisi.
Shuningdek, Matyoqub Matchonovning “Sehrlandiya: qahramonlik missiyasi”ni “xalqaro darajadagi pishiq multfilm” deb taʼrifladi.
“Dunyo animatsiya bozorida ham hozir eng talabgir mahsulotlar toʻliq metrajli filmlar boʻlib turibdi. Mana, musiqasini oling: xabarim bor, multfilm uchun maxsus yozildi. Ovoz effektlari Hindistonda qilindi. Xolis tan olib aytsak, xalqaro darajadagi pishiq multfilm ishlandi”, - deya qoʻshimcha qildi u.
Bolalar kontentini rivojlantirish markazi Ekspertlar kengashi raisi Matyoqub Matchonov “Sehrlandiya” ijodkorlariga omad tiladi.
Maʼlumot uchun, Oʻzbekistondagi ilk toʻliq metrajli 3D formatdagi “Sehrlandiya: qahramonlik missiyasi” multfilmi premerasi 25-dekabr kuni Oʻzbekiston Milliy kino saroyida boʻlib oʻtadi.
