19-dekabr kuni Bolalar kontentini rivojlantirish markazi buyurtmasiga asosan “Lola Animation” studiyasi tomonidan ishlangan “Sehrlandiya: qahramonlik missiyasi” animatsion filmi premyerasi bo‘lib o‘tdi.
Shu kuni Toshkentdagi O‘zbekiston Milliy kino san’ati saroyida shunchaki premyera bo‘lgani yo‘q, balki mamlakat tarixidagi ilk to‘liq metrajli 3D format multfilm, ta’bir joiz bo‘lsa, o‘zining dastlabki 2000 nafar yosh tomoshabini sinovidan o‘tdi. “Sehrlandiya”ning yakunlovchi titrlari ekranga chiqa boshlagan vaqtdagi minglab bolalarning davomli olqishlari va samimiy xursandchiligi imtihon a’lo bahoga topshirilganining tasdig‘i bo‘lsa ne ajab!
O‘zbekistonlik bolalar uchun Yangi yil bayramining asosiy sovg‘asiga aylangan ushbu film nafaqat yosh tomoshabinlar, balki jamoatchilik tomonidan ham iliq kutib olindi. Xususan, O‘zbekiston Milliy axborot agentligi muxbiri Nazokat Usmonova shunday yozadi: “Har bir ertak — bir haqiqat. Biroq buni inson katta bo‘lgach, anglab yetarkan. Har bir yaxshilik — chin qahramonlik. Qilinayotgan yaxshilikning chin ezgulik ekaniga ishonish esa muhim. “Sehrlandiya: qahramonlik missiyasi” animatsion filmi zamonaviy format va g‘oya asosida yaratilgan bo‘lsa-da, yosh tomoshabinlarni ayni fikrlar haqida astoydil mushohada yuritishga undagani aniq”.
“Bugungi davr o‘zbek bolalari nimani ko‘radi? Ular uchun qanday zamonaviy media-mahsulotlar bor? Davlatimiz rahbari tashabbusi bilan tashkil etilgan Bolalar kontentini rivojlantirish markazi faoliyatining dastlabki kunlaridanoq ana shu savollar atrofida izlandi. “Sehrlandiya: qahramonlik missiyasi” esa birinchi katta javob... O‘zbek kinosida animatsiya uzoq yillar davomida asosan qisqa metrajli va cheklangan imkoniyatlar doirasida rivojlangan. Bugun ana shu manzara butunlay o‘zgarmoqda. Yangi loyiha nafaqat ijodiy jamoaning yutug‘i, balki davlat miqyosida bolalar uchun sifatli kontent yaratishga qaratilgan tizimli yondashuvning natijasi ham”, — deyiladi “O‘zbekiston 24” telekanali muxbiri Nodira Odilovaning reportajida.
“Aniq.uz”ning yangi multfilm taqdimotiga bag‘ishlangan tahririyat maqolasida “Sehrlandiya” o‘zbekistonlik tomoshabinlarning “biznikilar ham qachon xorijning sifatli multfilmlariga o‘xshash asarlar ishlarkin”, degan orzularini ro‘yobga chiqarganini ta’kidlanadi. “Aytgancha, multfilm ijodkorlari bilan yana bir jabhada fikrimiz bir joydan chiqdi — robotlashtirish kelajakda yaxshi oqibatlarga olib kelmaydi. Sun’iy intellektni puxta o‘rganib, to‘g‘ri foydalanish esa har doim yordam beradi”, — deya qo‘shimcha qilingan maqolada.
Bu — bolalar uchun tayyorlangan yangi milliy media-mahsulotga bildirilayotgan munosabatlardan bir shingil edi. Quyida keltirilayotgan ro‘yxat orqali “Sehrlandiya: qahramonlik missiyasi” animatsion filmi premyerasi umuman OAVda qanday yoritilayotgani bilan tanishish mumkin:
- “O‘zbekiston 24”: “Sehrlandiya: qahramonlik missiyasi” to‘liq metrajli animatsion filmi taqdimoti
- O‘zA: “Sehrlandiya: qahramonlik missiyasi” animatsion filmi – yosh tomoshabinlar uchun betakror sovg‘a
- “Yoshlar” telekanali: O‘zbekiston tarixida ilk bor 3D formatda ishlangan to‘liq metrajli animatsion film - “Sehrlandiya: qahramonlik missiyasi” premyerasi bo‘lib o‘tdi
- “Kun.uz”: Saida Mirziyoyeva “Sehrlandiya” multfilmi haqida: “Bu – birinchi qadam”
- “Daryo”: O‘zbekistonda ilk 3D animatsion film 25-dekabrdan kinoteatrlarda namoyish etiladi
- “Gazeta”: O‘zbekistonda birinchi to‘liq metrajli 3D multfilm suratga olindi
- “Aniq.uz”: “Sehrlandiya”: “O‘rgimchak odam” emas — Jaloliddin, yovuzlik emas — yaxshilik, qo‘rqoqlik emas — ishonch!
- “YUz.uz”: “Sehrlandiya: qahramonlik missiyasi”
- “XS.uz”: “Milliy animatsiyada muhim qadam”. Saida Mirziyoyeva “Sehrlandiya” multfilmi premyerasida ishtirok etdi
- “Anhor.uz”: O‘zbekistonda 3D formatida yaratilgan ilk to‘liq metrajli animatsion film taqdim etildi
- “Qalampir.uz”: Saida Mirziyoyeva Disney vitse-prezidenti bilan o‘zbekcha multfilm tomosha qildi
- “Platina.uz”: “Sehrlandiya”: ilk 3D multfilm premyerasi bo‘lib o‘tdi
- “Zamon.uz”: O‘zbekistonda ilk bor 3D formatda animatsion film namoyish etildi
- “Darakchi.uz”: Saida Mirziyoyeva o‘g‘li bilan multfilm premyerasiga bordi
- “Xabardor.uz”: O‘zbekiston tarixida ilk bor 3D formatdagi to‘liq metrajli animatsion film ishlandi
- “Xabar.uz”: “Sehrlandiya: qahramonlik missiyasi” multfilmining premyerasi bo‘lib o‘tdi
- “Vaqt.uz”: Saida Mirziyoyeva o‘g‘lini “Sehrlandiya” multfilmi premyerasiga olib bordi
- “Zamin.uz”: O‘zbekistonda ilk 3D to‘liq metrajli multfilm premyerasi bo‘lib o‘tdi
Ma’lumot uchun, 25-dekabrdan yurtimiz kinoteatrlarida “Sehrlandiya: qahramonlik missiyasi” multfilmining ommaviy namoyishlari boshlanadi. Film treyleri va saundtreki bilan uning YouTube’dagi rasmiy sahifasida tanishish mumkin.
