Bolalar kontentini rivojlantirish markazi buyurtmasiga asosan “Lola Animation” studiyasi tomonidan Markaziy Osiyoda ilk bor 3D formatda ishlab chiqilgan toʻliq metrajli “Sehrlandiya: qahramonlik missiyasi” animatsion filmining taqdimoti 19-dekabr kuni Toshkentdagi Oʻzbekiston Milliy kino sanʼati saroyida boʻlib oʻtdi.
Film taqdimotida ijodiy jamoa, mahalliy va xalqaro media vakillari, xususan, The Walt Disney Company vitse-prezidenti, sakkiz karra “Emmy Award” xalqaro televizion mukofoti sovrindori Hayma Vashington, shuningdek, soha mutaxassislari, madaniyat va sanʼat namoyandalari hamda keng jamoatchilik vakillari ishtirok etdi.
“Sehrlandiya: qahramonlik missiyasi” animatsion filmi 5 yoshdan katta bolalar uchun moʻljallangan boʻlib, fantastik sarguzasht janrida, zamonaviy xalqaro animatsiya standartlari talablariga muvofiq ishlangan. Loyiha yosh avlod tarbiyasida muhim ahamiyatga ega boʻlgan maʼnaviy-maʼrifiy gʻoyalarni qamrab oladi va keng tomoshabinlar auditoriyasi uchun mos.
Filmning gʻoyaviy yoʻnalishi doʻstlik, jamoaviylik, jasorat, insof, masʼuliyatni his etish, yovuzlikka qarshi birlashib kurashish va insonparvarlik kabi umuminsoniy qadriyatlarni targʻib etishga qaratilgan. Oʻzbek tilidagi ushbu asar, taniqli kinoarboblar taʼkidlaganidek, milliy ruh va tarixiy merosimizga mos ravishda yaratilgan.
Toʻrt doʻst – Temur, Ulugʻbek, Bobur va Jaloliddin tasodifan sehrli portal orqali ixtirochi Zamonning qarorgohiga tushib qoladi. Shu fursatdan ularning Sehrlandiyadagi sirli sarguzashtlarga boy sayohati boshlanadi. U yerda bolalar vaqt mashinasini oʻgʻirlab, olamga egalik qilmoqchi boʻlgan yovuz Olaboʻji hamda uning qoʻshiniga qarshi kurashadi.
Film qahramonlariga Abdurahim Abdukarimov (Jaloliddin), Ulugʻbek Shodibekov (Temur), Jahongir Xoʻjayev (Bobur), Badriddin Husniddinov (Ulugʻbek), Sobirjon Rahimjonov (Bobo), Shahzoda Muhammedova (Bibi), Behzod Muhammadkarimov (Zamon), Boir Xolmirzayev (Olaboʻji), Alisher Uzoqov (Boʻji) va boshqalar ovoz bergan.
Filmning vizual va texnik yechimlari zamonaviy animatsiya talablariga toʻliq mos holda ishlangan. Sehrli olamlar, texnologik muhit, rang-barang landshaftlar va dinamik sahnalar orqali yuqori darajadagi vizual effektlar yaratilgan. Audio va musiqiy yechimlar yosh tomoshabinlarning psixologiyasi va qabul qilish xususiyatlariga muvofiq ishlangan. Uning ovoz effektlariga Hindistondagi mashhur “Jam8 Studio” tomonidan ishlov berilgan.
Mazkur animatsion film bolalarda ijobiy qahramonlik obrazini shakllantirish, oʻz-oʻziga ishonch, fidoyilik, ezgulikka intilish, Vatanga muhabbat va jamiyat oldidagi masʼuliyat hislarini kuchaytirishga xizmat qiladi. Film oila davrasida, taʼlim muassasalarida va bolalar markazlarida tomosha qilish uchun tavsiya etiladigan maʼrifiy mahsulot sifatida ahamiyatga ega.
Multfilm bilan birga uning mavzusidagi yondosh mahsulotlar — raqamli oʻyin, bolalar uchun kitob va tematik suvenirlar ham ishlab chiqilgan boʻlib, ular loyihaning kompleks targʻibot va media yoʻnalishlarini kengaytirishga xizmat qiladi.
Maʼlumot uchun, “Sehrlandiya: qahramonlik missiyasi” multfilmi 25-dekabrdan yurtimiz kinoteatrlarida namoyish etila boshlaydi. “Sehrlandiya”ning treyleri va saundtreki bilan uning YouTubeʼdagi rasmiy sahifasida tanishish mumkin.
