Buyuk Amir Temur bobomizning bolaligi haqidagi tarixiy-badiiy film uchun adabiy ssenariy yozish jarayoni oʻzining eng qizgʻin bosqichiga kirdi.
Markazda ssenariy mualliflari — Yusuf Roziqov va Qobiljon Shermatov, shuningdek, postanovkachi rejissyor Akbar Bekturdiyev ishtirokida ssenariyning dastlabki varianti muhokama qilindi.
“Bolalar haqidagi film va bolalar uchun film yaratish — bu ikki xil vazifa. Agar bolalar uchun tarixiy film yaratilsa, oldingizda jiddiy tanlov paydo boʻladi: film orqali bolalarga tarixni oʻrgatish kerakmi yoki Tеmurbekning shijoati, dovyurakligi, sadoqati va adolatparvarligini singdirish kerakmi? Albatta, har ikkisi ham muhim. Ammo shu ikki yoʻnalishni uygʻunlashtirib, bolalar uchun qiziqarli va taʼsirli ifoda topish — eng nozik masala. Biz jamoa bilan ayni paytda shu ustida ishlayapmiz”, — deydi Yusuf Roziqov.
