Bolalar kontentini rivojlantirish markazi direktori Jahongir Ahmedov “Art Craft” studiyasida boʻlib, “Zoocast” koʻp qismli animatsion podkast loyihasining tayyorlanish jarayoni bilan tanishdi.
“Zoocast” — bolalar uchun moʻljallangan koʻp qismli animatsion podkast boʻlib, unda:
sogʻlom turmush tarzi
koinot sirlari
internet xavfsizligi
tarixiy shaharlarimiz
atrof-muhitni asrash kabi muhim mavzular jonivorlar oʻrtasidagi qiziqarli bahs va yumor orqali yoritiladi.
Podkastning har bir qismi bolalarning mantiqiy fikrlashini rivojlantirib, ularni zamonaviy texnologiyalar va kelajak kasblari bilan tanishtiradi. Shu maʼnoda “Zoocast” yosh tomoshabinlar uchun ham taʼlimiy, ham koʻngilochar vizual loyiha boʻlib xizmat qiladi.
Ayni paytda podkast uchun maxsus qurilgan dekoratsiyada suratga olish ishlari bilan birga, qahramonlarni modellashtirish jarayoni davom etmoqda.
Yaqinda “Zoocast” koʻp qismli animatsion podkastining ilk qismlari bolajonlarga taqdim etilishi rejalashtirilgan.
